مختلف مذہبی گروہوں اور قومی اداروں میں یہ گمانِ باطل پایا جاتا ہے کہ ولایت فقیہ ایک ایرانی نظریہ ہے اور ہم پاکستانی ہیں اس لیے ہمیں اس سے کوئی سروکار نہیں ہونا چاہیے !! اگر ولایت فقیہ کو فروغ دیا جائے تو اس سے ایرانیت مسلط ہوتی جائے گی جس سے پاکستان کے مفادات اور سالمیت کو خطرہ ہے !! انقلابِ اسلامی سے اب تک واقعات واضح دلیل ہیں کہ یہ محض ایک باطل تفکر اور بدگمانی کے سوا کچھ نہیں ہے۔ اس حقیقت کا انکار نہیں ہے کہ ایران میں ایرانی قومیت کے عناصر قوی ہیں اور بہت سے مذہبی گروہ بھی قومیت کی اساس پر برتاؤ کرتے ہیں اور ممکن ہے بعض افراد اپنی سیاسی یا مالی قوت کی بدولت قومیت کی اساس پر کام بھی انجام دیتے ہوں ۔ لیکن ان مفاسد کا نظریہِ ولایت فقیہ سے تعلق نہیں ہے کیونکہ شر پسند اور فاسد طبقہ جسے دین اسلام نے منافق کہا ہے رسول اللہ ﷺ اور آئمہ اطہارؑ کے اردگرد بھی تھا۔ ان کے منافقانہ اعمال کی نسبت رسول اللہ ﷺ کو ہر گز نہیں دی جائے گی اور نہ ان مفسدین کی وجہ سے حکومتِ اسلامی اور شریعت کے احکام قابل اعتراض قرار پائیں گے۔ لہٰذا ولایت فقیہ اور ولی فقیہ سے مربوط افراد میں ایسے منافقین کی حرکات کو مذمت کی نگاہ سے دیکھنا ضروری ہے لیکن اس کی نسبت ہر گز ولایت فقیہ یا ولی فقیہ کی طرف نہیں دی جا سکتی۔

قومیت کے عناصر صرف دو ریاستوں میں نہیں پائے جاتے بلکہ ہر ریاست اس شیطانی تفکر کی تلخی کو جھیل رہا ہے۔ وطن عزیز میں بلوچ ، پٹھان، پنجابی و سندھی ایسے جھگڑے ہیں جو نہ کوئی ڈیم بننے دیتے ہیں اور صوبائی سطح پر ترقی کی راہ ہموار کرنے دیتے ہیں۔ پاکستان کا مشرقی حصہ فقط اور فقط وطنیت اور قومیت کی اساس پر ہم نے جدا ہو گیا ۔ قابل تعجب بات ہے کہ پاکستان کی تقسیم کبھی بھی مذہبی یا دینی نظریات پر نہیں ہوئی لیکن قومیت اور وطنیت کی اساس پر پاکستان تقسیم ہو گیا۔ بلوچستان میں آئے روز عسکری اداروں پر حملے بلوچی قومی تفکر کا نتیجہ ہے۔ پس ضروری ہے کہ بات حق اور عدل کی جائے نہ کہ قومیت و وطنیت کی۔ حتی وطن کی حفاظت اور وطن کی ضرورت حق اور عدل کی اساس پر ہے۔ ان نظریات سے بہت گہرے طور پر نتائج مختلف ہو جاتے ہیں، مثلاً ایک عسکری ادارہ جب قومیت کی اساس پر کاروائی کرتا ہے تو وہ حق و باطل اور عدل و ظلم کو نہیں دیکھتا اور قومیت کے مشرکانہ نظریہ کی اساس پر مسلمان ہی کو قتل و غارت کی بھینٹ چڑھا دیتا ہے ، جیساکہ صدام ، شاہِ ایران  اور وطن عزیز میں کئی کرنیل و جرنیل کے ہاتھ مسلمانوں کے خون سے رنگین ہیں۔ اس کی بجائے اگر حق و عدل کے نظریات کی اساس پر عسکری ادارے کاروائی کریں تو اس سے عدل و قانون کی بالا دستی قائم ہو گی۔

قومیت کے یہ عناصر ایران میں بھی پائے جاتے ہیں۔ ایرانیت کی پاکستان پر تسلط کا گمانِ باطل یہاں سے بھی دور ہو جاتا ہے کہ خود ایران میں مختلف قومیں جیسے بلوچ، فارس، ترک، کرد، لور اور عرب موجود ہیں۔ ان قومیتوں کے علاقوں میں انہی کی اقوام سے افراد حکمران بنتے ہیں۔ اگرچے پورے ملک سے اساسی حکمران جیسے صدر وغیرہ ملک کے کسی بھی علاقے سے منتخب ہو سکتے ہیں لیکن ایک صوبہ یا قوم پر عملی طور پر منصب دار انہی اقوام سے متعین کیے جاتے ہیں کیونکہ غیر اقوام کو اس صوبہ یا قصبہ کے لوگ بآسانی قبول نہیں کرتے۔ جب ایک چھوٹے سے علاقہ میں اختیاری حاکمیت کو کئی مشکلات درپیش ہیں تو کیسے تصور کیا جا سکتا ہے کہ وہ ایک پوری ریاست پر قومیت کو مسلط کر دے !! صرف ایران نہیں بلکہ دنیا کے کسی ملک پر کوئی دوسرا ملک اپنی قومیت کو مسلط نہیں کر سکتا۔ اس لیے استعمار قوموں کے اذہان کو غلام بنا کر خود انہی کو استعمال کر کے اپنی اجارہ داری قائم کرتا ہے۔ولایت فقیہ اس مقام پر آزادی اور فکری حریّت کا درس دیتی ہے اور قوموں کا اپنے ارادہ اور استقلال کے ساتھ کسی فکر کو قبول کر کے اسے اپنی ریاست پر قابل عمل کرنے کی قائل ہے۔ اس کے مقابلے میں استعمار سازش کے ذریعے غلامانہ تفکر کسی قوم پر مسلط کرتا ہے اور پھر ذہنی غلام قوم کو اپنے مفادات کے لیے استعمال کرتا ہے۔ اس استعماری ظالمانہ سازش کا نتیجہ یہ نکلتا ہے کہ ملک میں مارنے والا بھی اسی ملک کا ہے اور مرنے والا بھی اسی ملک ہے، پھر مسائل بڑھ جائیں یا امداد کی ضرورت پیش آئے تو جو پیسہ امداد کے نام پر دیا جا رہا ہے وہ بھی اسی ملک کا ہے اور جن کو فقیر قرار دے کر حاکمانہ انداز میں دیا جا رہا ہے وہ بھی اسی ملک کے ہیں !!